Мин, Степанов Сергей Иванович, бэс ыйын 26 күнүгэр Хорула сэлиэнньэтигэр төрөөбүтүм.
Ньурба нефтебазатыгар үлэлээбитим номнуо 34 сыл буолбут. Аан бастаан 1991 сыллаахха Убоян заправкатыгар операторынан киирэн үлэлээн саҕалаабытым. Старшайым Боблоев Владимир Лапсонович этэ. Ол саҕана нефтебаза директорынан Николаев Лазарь Ильич, главнай инженер Иванов Егор Александрович, учуот технигынан Керженцева Надежда Васильевна үлэлээбиттэрэ. Надежда Васильевналыын өр үлэлээбитим, урут учуот карточканнан отчуоттанааччы, элбэх ахсааннаах хап-халыҥ карточка, ону эбэн-көҕүрэтэн, тэҥнээн отчуоттаан туттарааччыбын.
Кыһыҥҥы навигация. Күҥҥэ 16-18тыы массыына кэлэр этэ. Билиҥҥи курдук компьютер суох буолан барыта илииннэн биэстии ТТН-каны копирка нөҥүө суруйарбыт. Тарбахпар чэр буолан хаалбыт уруучука суола ону туоһулуур. Тохсунньу ыйга 50-тан тахса градуска биир бензовоһу икки чаас кутарбыт. Сорох кун ниэп кутуута буоллагына олус ер буолааччы. Ол кэмҥэ хочуолунайдар оттуктара ниэп этэ. Аҕыйах хочуолунай чоҕунан оттуллара. Халлаан тымныытыгар ниэп тоҥор чинчилээх, сылытыы диэн суох буолан тимир турба тоҥо турар этэ. Инньэ гынан оройуону тоҥорбот сыалтан, хочуолнайдары хааччыйар курдук, күнүстэри-түүннэри солбуҺа сылдьан үлэни тохтоппокко үлэлиир этибит.
Сайыҥҥы навигация бэйэтэ туспа бырааһынньык. Сыллагы оттугу Бүлүү өрүһүнэн, танкердар таһаллар. Биэрэк үрдүгэр кып-кыра будкалаахпыт, онтубутун суунан-соттон, түннүктэригэр кумаартан, күлүмэнтэн харыстанан сетка иилинэбит. Танкертан оттук хачайдыыр турбалары бэлэмниибит, Роснефть, АЛРОСА, Туймаада представительлары кытта пааркаҕа баар емкастары пломбалыыбыт.
Навигациялар бүттүлэр да, тэрилтэннэн күһүн балыктыы, саас подледкалыы барар этибит. Урут, оннооҕор, куобах үүрээһинигэр, сылдьааччыбыт, билигин ол суох. Лазарь Ильич, Валерий Петрович сылдьыһааччылар, көхтөөх, бэһиэлэй баҕайы буолааччы, саныырга наһаа үчүгэй.
Мин билигин үлэлии сылдьар коллективым бары эрчимнээх, эдэр уолаттар, үлэлииргэ судургу, барытын тутатына ылыналлар, толороллор.
Баҕарыам этэ бииргэ улэлии сылдьар коллективпар таhаарыылаах үлэни, бигэ тирэҕи, чэгиэн доруобуйаны. Өссө даҕаны нефтебазабыт олоҕу кытта тэннэ хардыылаан тупса-сайда турдун.